周柏豪相隔六年終於重踏澳門舞台，在11月18日於澳門威尼斯人金光綜藝館舉行《2023周柏豪「奔赴」巡迴演唱會》澳門站。柏豪表示太耐冇做巡迴演出，突然有幾年冇辦法見到自己嘅歌迷，依家一有機會便要不顧一切咁去做，

要以最好狀態上舞台，所以把今次巡迴騷的主題命名為「奔赴」。

他又透露今次在音樂上將帶來新風格，以前總覺得自己的演唱會好像欠了點甚麼，他直言：「依家離開舒適區，經歷過响內地拍攝綜藝及競技節目後，覺得自己急促地成長。依家都能夠响演唱會上面，畀到幾part舞大家睇，我就覺得好滿意。」

他又指自己對澳門好有情意結，加上港澳兩地的粉絲反應，及對他的認知均差不多，他又有好多澳門朋友，他說：「以前都會親身嚟睇大賽車，我响呢度有好多朋友，格外有種在自己地方開演唱會嘅感覺。」今次開騷撞正大賽車舉行，他透露有機會便會留低在澳門觀賽。